ఏప్రిల్ 22న జరిగిన పహల్గాం ఉగ్రదాడిపై ప్రధాని నరేంద్ర మోదీ తొలిసారి స్పందించారు. బీహార్‌లో జరిగిన ఎన్నికల ర్యాలీలో ఆయన గట్టి మాటలతో ప్రపంచానికి స్పష్టమైన హెచ్చరిక పంపించారు. “ఉగ్రవాదులు ఎక్కడ ఉన్నా వారిని వెంబడించి శిక్షిస్తాం. వాళ్లను దాచే వాళ్లను కూడా విడిచిపెట్టం” అని మోదీ స్పష్టం చేశారు. ఈ దాడిలో 26 మంది అమాయకులు ప్రాణాలు కోల్పోయారు.
ఈ విషయాన్ని మోదీ హిందీలో చెబుతూనే, ఆంగ్లంలో కూడా ప్రపంచానికి ఒక స్పష్టమైన హెచ్చరికగా పేర్కొన్నారు. “India will track and punish every terrorist and their backers. We will pursue them till the end of the Earth” అని అన్నారు.
భారతదేశం సంయమనం కాదు, ప్రతీకారం చూపుతుంది
మోదీ గళం గట్టిగా మారింది. “ఇది 140 కోట్ల ప్రజల సంకల్పం. మన దేశం అమాయకుల్ని చంపిన ఉగ్రవాదులను ఊహించలేనంత స్థాయిలో శిక్షిస్తుంది. వాళ్లను దాచిన ప్రతి వారిని కూడా బయటికి తీస్తాం. భారత్ ఇప్పుడు ప్రతీకారం తీర్చే స్థితిలో ఉంది” అని మోదీ చెప్పారు.
Related News
దేశం అంతా ఉగ్రవాదులపై ఆగ్రహంతో ఉంది. ప్రభుత్వం గాయపడిన వారికి మెరుగైన వైద్యం అందించేందుకు కృషి చేస్తోంది. కుటుంబ సభ్యులను కోల్పోయిన వారికి మద్దతుగా దేశమంతా నిలుస్తోంది. మానవత్వాన్ని నమ్మే ప్రతి ఒక్కరు భారతదేశానికి అండగా ఉన్నారని మోదీ కృతజ్ఞతలు తెలిపారు.
పాకిస్థాన్‌పై భారత్ గట్టి చర్యలు
పహల్గాం దాడికి వెంటనే భారత ప్రభుత్వం పాకిస్థాన్‌పై కీలక నిర్ణయాలు తీసుకుంది. పాకిస్థాన్ పౌరులకు ఉన్న SAARC వీసా మినహాయింపు సదుపాయాన్ని రద్దు చేసింది. ప్రస్తుతం ఆ సదుపాయం కింద భారత్‌లో ఉన్న పాకిస్థానీలు 48 గంటల్లో దేశం విడిచిపోవాలని ఆదేశించింది.
మరోవైపు ఢిల్లీలో ఉన్న పాకిస్థాన్ హైకమిషన్‌కి సంబంధించి డిఫెన్స్, నేవీ, ఎయిర్ అటాషేలను “persona non grata”గా ప్రకటించి వారిని 7 రోజుల్లో దేశం విడిచి వెళ్లాలని తెలిపింది. భారత్‌లోని పాకిస్థాన్ దౌత్యకారుల సంఖ్యను 55 నుంచి 30కి తగ్గించనున్నారు. ఇదే విధంగా భారతీయ హైకమిషన్‌లో ఉన్న సిబ్బందినీ తగ్గించనున్నారు.
ఇండస్ వాటర్ ట్రీటిపై తాత్కాలిక నిలిపివేత
1960లో నెహ్రూ ఆధ్వర్యంలో జరిగిన ఇండస్ వాటర్ ఒప్పందాన్ని కూడా భారత్ తాత్కాలికంగా నిలిపివేస్తున్నట్టు ప్రకటించింది. పాకిస్థాన్ ఉగ్రవాదులకు పూర్ణంగా మద్దతు ఇవ్వడం మానేదాకా ఈ ఒప్పందం కొనసాగదని స్పష్టం చేసింది.
అటారీ బార్డర్ వద్ద ఉన్న ఇంటిగ్రేటెడ్ చెక్ పోస్ట్‌ను తక్షణమే మూసివేసింది. ఈ చర్యలన్నీ ఉగ్రవాదాన్ని ప్రోత్సహిస్తున్న పాకిస్థాన్‌కు గట్టి సందేశమని ప్రధాని కార్యాలయం పేర్కొంది.
ఉగ్రవాదంపై భారత్ యుద్ధంలా వ్యవహరిస్తోంది
ఈ దాడిపై ప్రజల్లో భయం ఉన్నప్పటికీ, ప్రధాని మోదీ మాటలు వారికి ధైర్యాన్ని ఇచ్చాయి. దేశం ఉగ్రవాదాన్ని అణిచివేయడంలో నిఖార్సైన చర్యలు తీసుకుంటోందని స్పష్టమైంది. ఇప్పుడు భారత్ సంయమనం చూపించబోదు. ప్రతీకారం చూపుతుంది. ఉగ్రవాదం ఎక్కడినుంచి వస్తుందో అక్కడికే వెళ్లి మూలాన్ని నరికేస్తుంది.
ఇది భారతదేశం ఇచ్చే గట్టి హెచ్చరిక మాత్రమే కాదు, ప్రపంచానికి ఒక శక్తివంతమైన సందేశం కూడా. ఇప్పుడు భారత్ “ఒక గట్టి దేశంగా” ఉగ్రవాదానికి ఎటువంటి ఆసరా లేదని చాటిచెబుతోంది అని స్పష్టం చేశారు.
