మాటలకన్నా చేతలే గొప్పవని నిరూపించిన గురువు

తూర్పుగోదావరి జిల్లా సీతానగరం మండలం చినకొండేపూడికి చెందిన నెక్కంటి నరసింహమూర్తి అనే రిటైర్డ్ ఉపాధ్యాయుడు తన జీవితాన్నే మారుస్తూ నిస్వార్థంగా సేవ చేస్తున్నది చూసి ప్రతి ఒక్కరూ ఆశ్చర్యపోతున్నారు. రిటైర్ అయిన తరువాత ఆయన దైనందిన జీవితానికి అవసరమైన పింఛన్‌ డబ్బుతో పాటు, తన సొంత ఆస్తిని కూడా ఖర్చు చేస్తూ సేవ కార్యక్రమాన్ని ప్రారంభించారు.

ఆదివారం నుంచి ఈ కార్యక్రమాన్ని ప్రారంభించిన నరసింహమూర్తి, వృద్ధుల కోసం ప్రతి రోజు రెండు పూటల భోజనాన్ని అందిస్తున్నారు.

క్యారేజీలో ప్రేమ, పెరుగు, పళ్ళతో పాటు అన్నం కూడా

ఈయన అందిస్తున్న భోజనం విషయానికి వస్తే, అది కేవలం అన్నం మాత్రమే కాదు. అన్నం, కూర, సాంబారు, ఉడికించిన గుడ్డు, పెరుగు, అరటి పండు ఇలా పూర్తి ఆహారాన్ని స్టీల్ క్యారేజీలో ప్యాక్ చేసి అందిస్తున్నారు. ఈ క్యారేజీలు కూడా ఆయన ప్రత్యేకంగా వంద పీసులు కొనుగోలు చేశారు. వృద్ధుల ఇళ్లకు స్వయంగా వెళ్లి ఆయనే తిండిని అందిస్తుంటారు. ఇది కేవలం ఆహారం కాకుండా ప్రేమను, సానుభూతిని పంచే ఒక మిషన్‌గా మారింది.

సొంత డబ్బులతో షెడ్ నిర్మించి, వంట కార్మికులను పెట్టుకున్న మానవతావాది

ఈ సేవా కార్యక్రమాన్ని కొనసాగించడానికి ఆయన ఒక షెడ్‌ను నిర్మించారు. ఈ పని కోసం 1.15 లక్షల రూపాయలు ఖర్చు చేశారు. అలాగే రోజూ వంట చేయించడానికి ఇద్దరిని ప్రత్యేకంగా నియమించారు. వంట సామాగ్రిని కూడా తన ఖర్చుతోనే కొనుగోలు చేశారు. ఇవన్నీ చేయడానికి ఆయనకు ఎటువంటి సహాయం అవసరం లేకుండా, తన కోరికతో, తన మనసుతో, తన డబ్బులతో ముందుకు సాగుతున్నారు.

రోజూ 50 మంది వృద్ధుల ఆకలిని తీర్చుతున్న నరసింహమూర్తి

ప్రస్తుతం రాజుపాలెం, చిన్నకొండేపూడి, కొత్తూరు గ్రామాల్లో మొత్తం 50 మంది వృద్ధులకు క్యారేజీలలో భోజనం పంపిస్తున్నారు. వీరి సంఖ్య రోజురోజుకు పెరుగుతుంది. మరిన్ని గ్రామాలలో గుర్తించి ఆ వృద్ధులకు కూడా తాను భోజనం అందిస్తానని నరసింహమూర్తి చెబుతున్నారు. వృద్ధులు అనారోగ్యంతో మంచానికే పరిమితమైనా, బయటకు వెళ్లలేని స్థితిలో ఉన్నా, తాను ఇంటికే వెళ్లి భోజనం అందిస్తున్నారు.

వృధ్ధుల కడుపు నిండితే

నరసింహమూర్తి గారి మాటల్లో, “వృద్ధులకు అన్నం పెడితే వాళ్ల కడుపు నిండుతుంది. వాళ్ల రోజు సంతోషంగా గడుస్తుంది. అదే నాకు ఆనందం.” ఇదే మాటలు నిత్యం చెబుతారు. ఆయన ఆప్యాయత, సేవ భావన చూసి స్థానికులు ఆశ్చర్యపోతున్నారు. ఇలాంటి సేవా కార్యక్రమానికి మనమంతా మద్దతుగా ఉండాల్సిన అవసరం ఉంది.

ఇలాంటోళ్లు ఈ రోజుల్లో అరుదే

పెన్షన్ డబ్బుతో ఒక వ్యక్తి ఇలా జీవితాంతం సేవ చేస్తుంటే, అది నిజంగా స్పూర్తిదాయకం. నరసింహమూర్తి గారు చెప్పిన పాఠాలు కేవలం బోధనలకే పరిమితం కాకుండా, జీవితంలో ఆచరణగా మారాయి. ఇది ఈ రోజుల్లో అందరూ నేర్చుకోవలసిన గొప్ప పాఠం.

మీ ఊర్లోనూ ఇలాంటోళ్లు ఉన్నారా?

ఈ కథనాన్ని చదివిన ప్రతి ఒక్కరూ ఒక్కసారైనా ఆలోచించాలి. మన చుట్టూ ఉన్న పేద, వృద్ధుల కోసం మనం చేయగలిగిన చిన్న సేవ కూడా వాళ్ల జీవితంలో పెద్ద మార్పు తీసుకురాగలదు. నరసింహమూర్తి గారు అందుకు జీవంత ఉదాహరణ.

ఇలాంటోళ్లు మరింత మంది మన సమాజంలో రావాలని ఆశిద్దాం. అలాంటి మనుషులను గుర్తించి ప్రోత్సహించడమే మన బాధ్యత. మీరు కూడా ఏదైనా సహాయం చేయగలరా? ఇప్పుడే ఆలోచించండి.