2025-26 విద్యా సంవత్సరానికి దేశవ్యాప్తంగా ఉన్న అన్ని రాష్ట్రాల్లోని కేంద్రీయ విద్యాలయాలలో 1 నుండి 11వ తరగతి వరకు ప్రవేశాలకు కేంద్రీయ విద్యాలయ సంఘటన్ (KVS) ప్రవేశ నోటిఫికేషన్‌ను విడుదల చేసింది. కేంద్ర, రాష్ట్ర ప్రభుత్వ సంస్థలు వాటి అనుబంధ సంస్థలు, రక్షణ రంగ సంస్థల ఉద్యోగుల పిల్లలు, వారి తల్లిదండ్రుల ఏకైక సంతానం అయిన బాలికలకు మొదటి ప్రాధాన్యత ఇవ్వబడుతుంది. ప్రవేశ పరీక్ష ఉండదు. అర్హత ఉన్న ఎవరైనా నమోదు చేసుకోవచ్చు.
1 నుండి 11వ తరగతి వరకు కేంద్రీయ విద్యాలయాలలో ప్రవేశాలకు SC అభ్యర్థులకు 15 శాతం, ST అభ్యర్థులకు 7.5 శాతం, OBC అభ్యర్థులకు 27 శాతం, దివ్యాంగులకు 3 శాతం రిజర్వేషన్లు ఉంటాయి. ఇది అన్ని కేంద్రీయ విద్యాలయాలకు వర్తిస్తుంది. మార్చి 31 నాటికి 1వ తరగతిలో ప్రవేశం కోరుకునే విద్యార్థులు 6 నుండి 8 సంవత్సరాల మధ్య వయస్సు కలిగి ఉండాలి. 2వ తరగతిలో ప్రవేశానికి వయోపరిమితి 7-9 సంవత్సరాలు, 3- 4 తరగతులకు 8-10 సంవత్సరాలు, 5వ తరగతికి 9-11 సంవత్సరాలు, 6వ తరగతికి 10-12 సంవత్సరాలు, 7వ తరగతికి 11-13 సంవత్సరాలు, 8వ తరగతికి 12-14 సంవత్సరాలు, 9వ తరగతికి 13-15 సంవత్సరాలు, 10వ తరగతికి 14-16 సంవత్సరాలు. ప్రభుత్వ నిబంధనల ప్రకారం.. రిజర్వ్‌డ్ కేటగిరీ విద్యార్థులకు వయోపరిమితిలో సడలింపు ఉంది. ప్రతి కేంద్రీయ విద్యాలయంలో తరగతికి రెండు విభాగాలు ఉంటాయి. ప్రతి విభాగంలో 40 సీట్లు ఉంటాయి. రెండు విభాగాలతో ప్రతి కేంద్రీయ విద్యాలయంలో తరగతికి 80 ప్రవేశాలు ఉంటాయి.
ఎంపిక ప్రక్రియ ఎలా ఉంటుంది?
Related News
మొదటి తరగతి ప్రవేశాలను ఆన్లైన్ లాటరీ విధానం ద్వారా ఎంపిక చేస్తారు. 2 నుండి 8వ తరగతి వరకు ప్రవేశాలకు ప్రవేశ పరీక్షలు లేవు. ప్రాధాన్యత కేటగిరీ విధానం ప్రకారం.. సీట్లు కేటాయించబడతాయి. సీట్ల సంఖ్య కంటే దరఖాస్తులు ఎక్కువగా ఉంటే లాటరీ పద్ధతి ద్వారా ఎంపిక చేస్తారు. 9వ తరగతిలో ప్రవేశాలకు ప్రవేశ పరీక్ష ఉంటుంది. 10వ తరగతిలో వచ్చిన మార్కుల ఆధారంగా 11వ తరగతిలో ప్రవేశాలు ఉంటాయి. 10వ తరగతిలో మిగిలిన సీట్లు ఉంటేనే ప్రవేశాలు జరుగుతాయి. 10వ తరగతి ఫలితాలు ప్రకటించిన పది రోజుల్లోపు 11వ తరగతి ప్రవేశాలకు రిజిస్ట్రేషన్లు పూర్తి చేయాలి. ఎంపికైన అభ్యర్థుల జాబితాను కూడా 20 రోజుల్లోపు ప్రకటిస్తారు. 1వ తరగతి ప్రవేశాలకు, దరఖాస్తులను ఆన్‌లైన్‌లో దాఖలు చేయాలి. 2 మరియు అంతకంటే ఎక్కువ తరగతులకు, దరఖాస్తులను ఆఫ్‌లైన్‌లో మాత్రమే చేయాలి. అంటే దరఖాస్తులను నేరుగా సంబంధిత కేంద్రీయ విద్యాలయాలకు సమర్పించాలి.
