మీ ఇంట్లో రేషన్ బియ్యం మిగిలిందా? దాన్ని వాడలేక ఇబ్బంది పడుతున్నారా? అయితే ఈ రెసిపీ మీకోసమే. రోజూ అదే రొట్టెలు, దోశలు తిన్నాక ఒక కొత్త బ్రేక్‌ఫాస్ట్ కోసం చూస్తున్నారా? మీరు వినని, కానీ ఒకప్పుడు అన్నివేళలా చేసుకునే ఆరోగ్యకరమైన టిఫెన్ పేరు వాము జావ. పాతకాలం నుంచి ఆరోగ్యానికి మేలు చేసే ఈ బ్రేక్‌ఫాస్ట్ రుచి మాత్రం ఇప్పటికీ టాప్‌లో ఉంటుంది. ఇది పిల్లలు ఇష్టంగా తినే ఫుడ్‌గానే కాదు, ఆరోగ్యాన్ని కాపాడే అద్భుతం కూడా.
ఈ వాము జావ రేషన్ బియ్యంతో తయారు చేస్తారు. మీరు మిల్లులో బియ్యాన్ని రవ్వలా పట్టించుకోండి లేక ఇంట్లో గ్రైండర్‌లో రవ్వలా చేసుకోండి. దీనికి అవసరమైన పదార్థాల్లో వాము ప్రత్యేక పాత్ర పోషిస్తుంది. దీనివల్ల జీర్ణవ్యవస్థ మెరుగవుతుంది. ఇంకా చింతపండు, ఉల్లిపాయలు, పచ్చిమిర్చి వంటి పదార్థాలతో ఈ వాము జావ మరింత రుచికరంగా తయారవుతుంది.
తయారీ విధానం చాలా ఈజీ. బియ్యం రవ్వను కడిగి ఉడికించాలి. చింతపండు నానబెట్టి గుజ్జుగా చేసుకోవాలి. ఉల్లిపాయలను పెద్ద ముక్కలుగా కట్ చేయాలి. స్టవ్ మీద గిన్నెలో నీళ్లు మరిగించాలి. అందులో బియ్యం రవ్వను వేసి ఉడికించాలి. తర్వాత అందులో చింతపండు గుజ్జు, వాము, కారం, పసుపు, ఉప్పు వేసి కలపాలి. తర్వాత కట్ చేసిన ఉల్లిపాయలు, పచ్చిమిర్చిని కూడా కలిపి ఉడికించాలి.
Related Posts
ఇంత వరకు ఉడికించిన మిశ్రమం పై తాలింపు పోస్తే మాత్రం అదిరిపోయే వాసన మంత్రముగ్దం చేస్తుంది. ఈ తాలింపులో ఆవాలు, జీలకర్ర, శనగపప్పు, మినపప్పు, ఎండుమిర్చి, కరివేపాకు, చిటికెడు ఇంగువ వంటివి వేసి వేగించి జావలో కలిపితేనే అసలైన వాము జావ సిద్ధమవుతుంది. ఇది వేడి వేడిగా సర్వ్ చేస్తే మీరు మరోసారి అడగకుండా ఉండలేరు.
ఇంతటితో ఈ జావ గొప్పదనం ముగియదు. ఇది ఆరోగ్యానికి ఎంతో మంచిది. గ్యాస్, అజీర్ణం లాంటి సమస్యలకు ఇది మంచి పరిష్కారం. పిల్లలకు బలాన్ని ఇస్తుంది. పెద్దలు కూడా ఆనందంగా తింటారు. పాతకాలపు తినుబండారంలో మరిచిపోకుండా ఉండాల్సిన ముఖ్యమైన వంటకం ఇది.
ఈ వాము జావను ఒకసారి చేసి తిన్నవాళ్లే దాని రుచిని అసలైనదిగా చెబుతారు. మీరు కూడా ఓసారి ట్రై చేయండి. ఇంట్లో అందరూ మెచ్చికునేలా చేస్తుంది. మరి ఆలస్యం ఎందుకు? ఈ వారం ఆ ఉదయపు టిఫెన్ ప్లేట్‌ను ఆరోగ్యంతో నింపండి!
