తెలంగాణ వ్యాప్తంగా 10వ తరగతి పబ్లిక్ పరీక్షలు రేపు (మార్చి 21) ప్రారంభం కానున్నాయి. ఈ పరీక్షలు మార్చి 21న ప్రారంభమై ఏప్రిల్ 4 వరకు కొనసాగుతాయి. అధికారులు ఇప్పటికే అన్ని ఏర్పాట్లు పూర్తి చేశారు. ఇంటర్మీడియట్ పరీక్షల మాదిరిగానే 10వ తరగతి పరీక్షలకు ఐదు నిమిషాల గ్రేస్ టైమ్ ఇస్తున్నట్లు విద్యా శాఖ ప్రకటించింది. అంటే, ఉదయం 9:30 గంటలకు పరీక్ష ప్రారంభం కాగా, ఉదయం 9:35 గంటల వరకు ఆలస్యంగా వచ్చే విద్యార్థులను అనుమతిస్తారు, కానీ ఆ తర్వాత వచ్చే విద్యార్థులను ఎట్టి పరిస్థితుల్లోనూ అనుమతించబోమని ప్రభుత్వ పరీక్షల శాఖ డైరెక్టర్ కృష్ణారావు తెలిపారు. హాల్ టిక్కెట్లు ఇప్పటికే విడుదలయ్యాయని, విద్యార్థులు వాటిని నేరుగా వెబ్‌సైట్ నుండి డౌన్‌లోడ్ చేసుకోవచ్చని ఆయన స్పష్టం చేశారు. రాష్ట్రవ్యాప్తంగా మొత్తం 2,650 కేంద్రాలను ఏర్పాటు చేశారు. ఈ సంవత్సరం మొత్తం 5,09,403 మంది విద్యార్థులు 10వ తరగతి పరీక్షలు రాయబోతున్నారని ఆయన అన్నారు. కాంపోజిట్ పేపర్ల కోసం పరీక్షలు ఉదయం 9:30 నుండి మధ్యాహ్నం 12:50 గంటల వరకు నిర్వహించనున్నట్లు ఆయన తెలిపారు.