విజయవాడలో ముఖ్యమంత్రి వైఎస్‌ జగన్‌మోహన్‌రెడ్డి చేపట్టిన మేమంతా సిద్ధం బస్సుయాత్రలో అపశృతి చోటుచేసుకుంది. కొందరు దుండగులు ముఖ్యమంత్రిపై రాళ్లు రువ్వడంతో ఆయన ఎడమ కన్నుకు తీవ్రగాయాలయ్యాయి. విజయవాడ సింగ్‌నగర్‌ దాబా కోట్ల సెంటర్‌లో ఈ ఘటన చోటుచేసుకుంది. బస్సు నుంచి బయటకు వచ్చి ప్రజలకు అభివాదం చేస్తున్న సమయంలో ప్రణాళికాబద్ధంగా రాళ్లదాడి జరిగినట్లు సమాచారం. క్యాట్‌బాల్‌పై రాయి విసరడంతో ఆ రాయి వేగంగా వచ్చి జగన్ ఎడమ కనుబొమ్మకు తగిలింది. దీంతో కంటి దగ్గర వాపు వచ్చింది. జగన్‌కు వైద్యులు ప్రాథమిక చికిత్స అందించారు. చికిత్స అనంతరం బస్సు ప్రయాణం యథావిధిగా కొనసాగుతోంది.
ఈ ఘటనలో మంత్రి వెల్లంపల్లి శ్రీనివాస్‌కు కూడా గాయాలయ్యాయి. ఘటనకు సంబంధించిన సీసీటీవీ ఫుటేజీని పోలీసులు పరిశీలిస్తున్నారు. జగన్ పై దాడి జరిగిన ప్రాంతంలో ఓ వైపు పాఠశాల, మరోవైపు రెండంతస్తుల భవనాలు ఉన్నాయి. మరోవైపు ఈ దాడిలో విద్యుత్‌ సరఫరాకు అంతరాయం ఏర్పడింది. ప్రజాభిమానాన్ని భరించలేకనే సీఎం జగన్‌పై టీడీపీ వర్గాలు దాడికి పాల్పడ్డాయని విజయవాడ వైఎస్సార్సీపీ నేతలు ఆరోపిస్తున్నారు.
Related News
