ప్రభుత్వ రంగ బీమా దిగ్గజం ఎల్‌ఐసి చాలా కాలంగా ఆరోగ్య బీమా రంగంలోకి ప్రవేశించడానికి ప్రయత్నిస్తోంది. గత ఏడాది చివర్లో ఆరోగ్య బీమా కంపెనీలో వాటాను కొనుగోలు చేయడం ద్వారా ఈ వ్యాపారంలోకి ప్రవేశించాలని యోచిస్తున్నట్లు సమస్త సీఈఓ సిద్ధార్థ్ మొహంతి గతంలో చెప్పారు.
రాబోయే రెండు వారాల్లో ఆరోగ్య బీమా కంపెనీలో వాటాను కొనుగోలు చేస్తామని ఆయన ఇటీవల ధృవీకరించారు. కొనుగోలు చేయబోయే కంపెనీని గుర్తించామని, దీనికి సంబంధించిన చర్చలు చివరి దశలో ఉన్నాయని, మార్చి 31 నాటికి ఒప్పందం గురించి ప్రకటన వెలువడుతుందని ఆయన అన్నారు. మంగళవారం జరిగిన జిసిఎ25 కార్యక్రమంలో సిద్ధార్థ్ మొహంతి విలేకరులతో మాట్లాడుతూ.. ఆరోగ్య బీమా కంపెనీని కొనుగోలు చేయడంపై చర్చలు చివరి దశలో ఉన్నాయని అన్నారు. అయితే, కంపెనీలో 51 శాతం లేదా అంతకంటే ఎక్కువ మెజారిటీ వాటాను కొనుగోలు చేసే ప్రణాళిక లేదు. ఎల్‌ఐసి బోర్డు నిర్ణయం, కంపెనీ వాల్యుయేషన్ ఆధారంగా ఎంత వాటాను కొనుగోలు చేయాలనే దానిపై నిర్ణయం తీసుకుంటామని మొహంతి స్పష్టం చేశారు.
అదే సమయంలో, ఏ కంపెనీలో వాటాను కొనుగోలు చేస్తారో ఆయన చెప్పలేదు. అయితే, గత సంవత్సరం చివర్లో, మణిపాల్ ఎడ్యుకేషన్ అండ్ మెడికల్ గ్రూప్, అమెరికాకు చెందిన సిగ్నా కార్పొరేషన్ మధ్య జాయింట్ వెంచర్ అయిన మణిపాల్ సిగ్నా హెల్త్ ఇన్సూరెన్స్‌లో 50 శాతం వాటాను కొనుగోలు చేయడానికి LIC చర్చలు జరుపుతున్నట్లు నివేదికలు వచ్చాయి.
Related News
