అమిత్ షా నివాసంలో హై లెవెల్ మీటింగ్

ఈ నిర్ణయాన్ని కొనసాగించేందుకు ఏప్రిల్ 25న హోం మంత్రి అమిత్ షా నివాసంలో ఉన్నత స్థాయి సమావేశం జరిగింది. ఈ సమావేశంలో ఇండస్ వాటర్ ట్రీటీపై ముందస్తు చర్యలపై చర్చించబడింది. ఈ ఒప్పందాన్ని పహల్గాం ఉగ్రదాడి తర్వాత సస్పెండ్ చేశారు. ఆ దాడిలో 26 మంది పర్యాటకులు మరణించిన సంగతి తెలిసిందే.

మూడు శక్తివంతమైన పథకాలు సిద్ధం

భారత ప్రభుత్వం ఇప్పటికే మూడు ప్రధాన కార్యాచరణ ప్రణాళికలను సిద్ధం చేసింది. షార్ట్ టర్మ్ ప్లాన్ లో వెంటనే అమలు చేయగలిగే హైడ్రో ప్రాజెక్టులు ఉన్నాయి. పాక్ అభ్యంతరాలు చెప్పిన ప్రాజెక్టులపై కూడా వేగంగా ముందుకు వెళ్లాలని భారత్ యోచిస్తోంది. మిడ్ టర్మ్ ప్లాన్‌లో నదీ ప్రవాహాన్ని మళ్లించే మార్గాలు, కొత్త ప్రాజెక్టులపై దృష్టి పెట్టారు. లాంగ్ టర్మ్ ప్లాన్ లో పెద్ద ఎత్తున డ్యామ్‌ల నిర్మాణం, డీ-సిల్టింగ్, వరదల డేటా పంపిణీ ఆపే చర్యలు ఉన్నాయి.

Related News

పాక్‌కి ఇక హెడ్రోలాజికల్ డేటా కూడా ఇవ్వం

ఇంతకుముందు వరదలు లేదా ఎండల సమయాల్లో భారతదేశం పాక్‌కి హెడ్రోలాజికల్ డేటా అందించేది. కానీ ఇప్పుడు అది కూడా ఆపేయాలని ప్రభుత్వం ప్లాన్ చేస్తోంది. ఈ సమాచారంతో పాక్ వరదల నుంచి జాగ్రత్తపడేది. ఇప్పుడు అది లేకపోతే అక్కడ పరిస్థితి మరింత క్లిష్టంగా మారే అవకాశం ఉంది.

ప్రధానమంత్రితో CCS సమావేశం – తుది నిర్ణయం

ఈ నిర్ణయం ప్రధాని మోడీ అధ్యక్షతన జరిగిన క్యాబినెట్ కమిటీ ఆన్ సెక్యూరిటీ (CCS) మీటింగ్‌లో తీసుకున్నారు. ఈ ట్రీటీ భారతదేశం పట్ల పాక్ ప్రవర్తిస్తున్న విధానాలపై తీవ్ర అసంతృప్తితో రద్దు చేశారు. పాక్ తరచూ భారత భూభాగమైన జమ్మూ కశ్మీర్ మీద ఉగ్రవాద చర్యలు చేస్తున్న నేపథ్యంలో ఈ నిర్ణయం తీసుకున్నారు.

పాక్ రియాక్షన్ – యుద్ధ చర్యగా పరిగణిస్తాం అంటోంది

ఇండియా నిర్ణయానికి పాక్ తీవ్రంగా స్పందించింది. ఇది తమ దేశానికి “జీవనాధారమైన ఒప్పందం” అని పేర్కొంది. నీటి ప్రవాహాన్ని నిలిపేస్తే అది యుద్ధ చర్యగా పరిగణిస్తామని హెచ్చరించింది. అంతే కాదు, అంతర్జాతీయంగా స్పందించేందుకు కూడా పాక్ సిద్ధంగా ఉందని వెల్లడించింది.

ఇండస్ వాటర్ ట్రీటీ అంటే ఏంటి?

1960లో ఇండియా, పాక్ మధ్య జరిగిన ఈ ఒప్పందం ద్వారా, ఇండస్ నదికి చెందిన మొత్తం ఆరు నదుల నీటిని విభజించారు. బియాస్, రవి, సుట్లెజ్ నదుల నీరు భారతదేశానికి ఇవ్వగా, చెనాబ్, ఇండస్, జెలమ్ నదుల నీరు పాకిస్థాన్‌కి కేటాయించారు. ఈ ఒప్పందానికి వరల్డ్ బ్యాంక్ కూడా సంతకం చేసింది.

నమ్మకాన్ని వదిలి ఉగ్రవాదాన్ని ఎంచుకున్న పాక్

భారత నీటి వనరుల కార్యదర్శి దేవశ్రీ ముఖర్జీ పాకిస్థాన్‌కు రాసిన లేఖలో పేర్కొన్నది, “ఒప్పందాలను నిజాయితీగా పాటించాల్సిన బాధ్యత ప్రతి దేశానిదే. కానీ పాక్ నిత్యం భారతదేశంపై ఉగ్రదాడులకు పాల్పడుతోంది. అందుకే ఈ ట్రీటీని కొనసాగించాల్సిన అవసరం లేదని మేము నిర్ణయించుకున్నాం” అన్నారు.

మొత్తం మీద ఇదే ఫైనల్ వర్డ్ – నీరు లేదు, ఉపశమనం లేదు!

ఈ నిర్ణయం పాకిస్థాన్‌పై ఒక తీవ్ర ఒత్తిడిగా మారనుంది. ఒకవేళ ఇది అమలులోకి వస్తే, పాక్‌కి తాగునీరు, వ్యవసాయ నీరు వంటి వాటిపై తీవ్రమైన ప్రభావం పడే అవకాశం ఉంది. ఇక పాక్ ఈ నిర్ణయాన్ని అంతర్జాతీయంగా ఎలా ఎదుర్కుంటుందో చూడాలి. కానీ భారత్ మాత్రం ఈసారి తలవంచే మూడులో లేదని స్పష్టంగా వెల్లడించింది.