వెజిటేరియన్లు ఎక్కువగా ఆరోగ్యాన్ని చూసి తింటారు. కానీ రుచి విషయంలో మాత్రం కొంచెం అసంతృప్తి ఉంటుంది. మటన్, చికెన్‌ లాంటి నాన్వెజ్ ఐటమ్స్‌ తినేవారికి ఎన్నో వెరైటీలు, టేస్ట్, పోషకాలు లభిస్తాయి. కానీ శాకాహారులు ఎక్కువగా పనీర్‌, మష్రూమ్‌లకు మాత్రమే పరిమితమవుతారు. కానీ తాజాగా జార్ఖండ్‌లో నుండి వచ్చి ఇప్పుడు దేశవ్యాప్తంగా పాపులర్‌ అవుతోన్న ఓ అరుదైన కూర ‘రుగ్డా’ మాత్రం ఈ మ్యాచింగ్‌ను పూర్తిగా మార్చేస్తోంది.
వెజ్‌లో మటన్ రుచి.. అదే రుగ్డా
రుగ్డా అనేది ఒక ప్రత్యేకమైన మష్రూమ్‌. ఇది మామూలుగా మన మార్కెట్‌లో కనిపించదు. వర్షాకాలం వచ్చే జూలై, ఆగస్టు నెలల్లో మాత్రమే కొన్ని అడవుల్లో మాత్రమే కనిపిస్తుంది. అందుకే దీన్ని చాలా మంది వెజ్ మటన్ అని కూడా పిలుస్తున్నారు. ఎందుకంటే ఇది రుచిలో మటన్‌ను తలపిస్తుంది. దాని టెక్స్చర్‌, వాసన, టేస్ట్ అన్నీ కూడా మటన్‌లాగే అనిపిస్తాయి. పైగా ఇది ఒక వెజిటేరియన్ ఫుడ్‌ కావడంతో చాలామంది ఆరోగ్యంపై శ్రద్ధ చూపించే వాళ్లకు బాగా నచ్చుతుంది.
పోషకాల పుట్ట
ఈ రుగ్డా మష్రూమ్‌ ఒక ఔషధ కూరగాయలా పని చేస్తుంది. ఇందులో ప్రోటీన్‌ ఎక్కువగా ఉంటుంది. శరీరానికి అవసరమైన విటమిన్‌ సి, విటమిన్‌ బీ కాంప్లెక్స్‌, బీ12, థయామిన్‌, రిబోఫ్లావిన్‌, ఫోలిక్ యాసిడ్‌ వంటి ముఖ్యమైన పోషకాలు ఇందులో ఉన్నాయి. ఇంకా దీనిలో కాపర్‌, కాల్షియం, ఫాస్ఫరస్‌, పొటాషియం, విటమిన్‌ డి కూడా ఎక్కువగా లభిస్తాయి. ఇవన్నీ మన ఆరోగ్యాన్ని మెరుగుపరచడంలో కీలక పాత్ర పోషిస్తాయి.
[news_related_post]దీనిని తినేవారికి ఫిజికల్‌ స్ట్రెంత్‌ పెరగడమే కాకుండా, ఇమ్యూనిటీ సిస్టమ్‌ బలంగా ఉంటుంది. ఇందులో కేలరీలు చాలా తక్కువగా ఉండటంతో డయాబెటిక్‌ రోగులకు, గుండె సంబంధిత సమస్యలున్నవారికి ఇది సేఫ్‌. దీంతోపాటు ఇది బరువు తగ్గాలనుకునే వారికి చాలా ఉపయోగపడుతుంది. ఎందుకంటే ఇందులో కార్బోహైడ్రేట్స్‌ చాలా తక్కువగా ఉంటాయి.
రుగ్డా ఆరోగ్య ప్రయోజనాలు
ఒకవేళ ఎవరికైనా ఆస్తమా, మలబద్ధకం, చర్మ సంబంధిత సమస్యలు ఉంటే.. రుగ్డా ఆ సమస్యలను తక్కువ సమయంలో తగ్గించడంలో సహాయపడుతుంది. ఇది ఆహారంగా మాత్రమే కాదు.. ఔషధంగా కూడా పనిచేస్తుంది. ఝార్ఖండ్‌, ఒడిశా, పశ్చిమ బెంగాల్‌ వంటి రాష్ట్రాల్లో ఆయుర్వేద వైద్యులు దీన్ని మెడిసిన్‌లా సజెస్ట్‌ చేస్తున్నారు.
విశేషంగా చెప్పాల్సిందేంటంటే.. క్యాన్సర్ వంటి తీవ్రమైన వ్యాధులకు ఇది సహజ నివారణగా పనిచేస్తుందని పరిశోధనలు చెబుతున్నాయి. ఈ రుగ్డాలో యాంటీఆక్సిడెంట్స్‌ అధికంగా ఉండటం వల్ల శరీరంలోని హానికర ఫ్రీ రాడికల్స్‌ను తొలగించి కణాలను రక్షిస్తాయి. ఇదే కారణంగా దీన్ని నేటి కాలంలో ‘సూపర్‌ఫుడ్‌’ అని పిలుస్తున్నారు.
అరుదైన ఈ కూర ఎక్కడ దొరుకుతుంది?
రుగ్డా ని ఎవరూ పంటగా పండించరు. ఇది ప్రకృతిలో తానే పెరుగుతుంది. ముఖ్యంగా వర్షాకాలంలో మాత్రమే లభించే ఈ మష్రూమ్‌ ఝార్ఖండ్‌లోని సాల్ చెట్ల కింద కనిపిస్తుంది. అడవుల్లో నివసించే ఆదివాసీ మహిళలు గంటల తరబడి శ్రమించి దీన్ని సేకరిస్తారు. బుందు, తామర్‌, పిఠౌరియా ప్రాంతాల్లో ఈ రుగ్డా ఎక్కువగా లభిస్తుంది.
ఈ కూర ఏటా జూలై, ఆగస్టు నెలల్లో మాత్రమే మార్కెట్‌లోకి వస్తుంది. మార్కెట్‌లోకి వచ్చిన వెంటనే డిమాండ్‌ పెరిగిపోతుంది. అందుకే దీని ధర కూడా కిలోకి రూ.300 నుండి రూ.1000 వరకు చేరుతుంది. ఇక ఇది ఝార్ఖండ్‌తో పాటు ఉత్తరాఖండ్‌, ఒడిశా, బెంగాల్‌లోనూ కొంతమేర దొరుకుతుంది. మొత్తం 12 రకాల రుగ్డా మష్రూమ్స్‌ ఉన్నప్పటికీ తెల్లటి రంగులో ఉండే రుగ్డా అత్యంత ఆరోగ్యకరమైనదిగా భావిస్తారు.
రుచికరమైన రుగ్డా కర్రీ తయారీ విధానం
ఈ రుగ్డాను వండడం కూడా ఎంతో ప్రత్యేకం. మొదట ఈ మష్రూమ్‌ను శుభ్రంగా కడిగి రెండు ముక్కలుగా కట్‌ చేయాలి. తరువాత ఓ పాన్‌లో కొంచెం ఆయిల్‌ వేసి ఈ ముక్కలను బాగా వేయించాలి. అవి గోధుమ రంగులోకి మారిన తర్వాత తీసేసి పక్కన పెట్టాలి. అదే పాన్‌లో మరోసారి కొంచెం ఆయిల్‌ వేసి, జీలకర్ర వేయాలి. తరువాత చిన్నగా తరిగిన ఉల్లిపాయ, టమాటా, అల్లం వెల్లుల్లి పేస్ట్‌, పసుపు, ధనియాల పొడి, కారం, గరం మసాలా వేసి బాగా వేయించాలి. మసాలా రెడీ అయిన తర్వాత ముందుగా వేయించిన రుగ్డా ముక్కలను అందులో వేసి, రుచికి సరిపడా ఉప్పు కలిపి కొద్దిగా నీళ్లు పోసి తక్కువ మంటపై 5-7 నిమిషాలు ఉడికించాలి. అంతే! వెజ్ మటన్ రెడీ!
ఇప్పటి నుంచే గమనించండి
రెండు నెలల పాటు మాత్రమే లభించే ఈ ప్రత్యేకమైన రుగ్డా మష్రూమ్‌ను ప్రతి ఒక్కరూ తప్పకుండా ట్రై చేయాలి. ఇది ఒక పక్క రుచి, మరో పక్క ఆరోగ్యం కూడా అందిస్తుంది. ఒకసారి దీన్ని తింటే మటన్‌ను మరచిపోతారు అంటున్నారు అక్కడివాళ్లు. ఇక దీని ఆరోగ్య ప్రయోజనాలు చెప్పడానికి మాటలే లేవు. తక్కువ సమయంలో శరీర బలాన్ని పెంచాలని, ఇమ్యూనిటీని బాగా బూస్ట్‌ చేయాలని అనుకునేవాళ్లందరికీ ఇది ఒక నేచురల్ మెడిసిన్‌లా పనిచేస్తుంది.
మీరు వెజిటేరియన్ అయితే, ఇది మీకు మటన్‌కు బదులుగా బాగా నచ్చుతుంది. నాన్వెజ్ తినని కుటుంబ సభ్యులు ఉన్నా కూడా వారికీ ఇది గొప్ప ఆప్షన్‌. జూలై, ఆగస్టు నెలల్లో మార్కెట్‌లో కనిపించిన వెంటనే కొనేసుకోండి. లేదంటే వచ్చే ఏడాది వరకూ ఎదురుచూడాల్సిందే!
ఈసారి వర్షాకాలంలో మీ ప్లేట్‌లో మటన్ కాదుగానీ.. వెజ్ మటన్ అయిన రుగ్డా ఉండేలా చూసుకోండి!
