రాష్ట్రంలోని వివిధ ప్రభుత్వ, ప్రైవేట్ సంస్థలలో చదువుతున్న బిఎస్సీ నర్సింగ్, జిఎన్ఎమ్, ఎఎన్ఎమ్ విద్యార్థులకు జర్మనీ, యూరోపియన్ దేశాలలో ఉద్యోగ అవకాశాలు పొందడానికి ఆంధ్రప్రదేశ్ స్కిల్ డెవలప్‌మెంట్ కార్పొరేషన్, స్కిల్ బీ మధ్య ఒక అవగాహన ఒప్పందం కుదిరింది. మంత్రి లోకేష్ సమక్షంలో ఇరువర్గాలు ఈ అవగాహన ఒప్పందంపై సంతకం చేశాయి. ఈ సందర్భంగా మంత్రి లోకేష్ మాట్లాడుతూ.. జర్మనీలోని వృద్ధుల సంరక్షణ, ఆసుపత్రులలో 3 లక్షల మంది నర్సింగ్ అభ్యర్థుల కొరత ఉందని అన్నారు. ఆంధ్రప్రదేశ్ నుండి నర్సింగ్ విద్యార్థులకు జర్మన్ భాషలో నైపుణ్యాభివృద్ధి శిక్షణ ద్వారా, ప్రతి సంవత్సరం 1,000 మందికి ఉత్తమ ప్యాకేజీతో జర్మనీలో ఉద్యోగాలు లభిస్తాయని ఆయన అన్నారు. స్కిల్‌బీ ఇండియా ప్రైవేట్ లిమిటెడ్ సహ వ్యవస్థాపకుడు వింజమూరి రవిచంద్రగౌతమ్, సిఇఒ ఉజ్వల్ చౌహాన్ మాట్లాడుతూ.. తమ సంస్థ ఇప్పటివరకు 10,000 మందికి పైగా విదేశాలలో ఉద్యోగాలు కల్పించిందని అన్నారు. స్కిల్ బీ అత్యుత్తమ అంతర్జాతీయ నియామక స్టార్టప్‌లలో ఒకటి అని ఆయన అన్నారు.
జర్మనీ, పోలాండ్, హంగేరీ, లిథువేనియా, లాట్వియా, ఇతర తూర్పు యూరోపియన్ దేశాలకు తమ సంస్థ ద్వారా అభ్యర్థులను నియమిస్తున్నామని ఆయన అన్నారు. రాష్ట్రంలోని ప్రభుత్వ నర్సింగ్ కళాశాలలు, విశాఖపట్నంలోని ప్రైవేట్ నర్సింగ్ కళాశాలలు, తూర్పు గోదావరి, విజయనగరం, శ్రీకాకుళం పరిసర ప్రాంతాల నుండి 4,000 మందికి పైగా నర్సింగ్ విద్యార్థులకు స్కిల్ బీ ద్వారా జర్మన్ భాషలో నైపుణ్యాభివృద్ధి శిక్షణ అందించనున్నట్లు ఆయన తెలిపారు.
