దాదాపు అందరికీ ఒకే ఆలోచన ఉంటుంది.. జీవితంలో కోరుకున్నంత సంపాదించాలి, ఇష్టం వచ్చినట్లు జీవించాలి. కొందరు ఆ లక్ష్యాన్ని త్వరగా సాధిస్తారు..
మరికొందరు దానిని సాధించే ప్రయత్నాల్లో చివరి దశకు చేరుకుంటారు. అయితే ఓ యువ వ్యాపారికి విచిత్రమైన పరిస్థితి ఎదురైంది. చిన్న వయసులోనే వేల కోట్ల రూపాయలు సంపాదించాడు. ఇప్పుడు ఏం చేయాలో తెలియడం లేదని అంటున్నాడు (వినయ్ హిరేమత్).
భారతీయ సంతతికి చెందిన వినయ్ హిరేమత్ లూమ్ అనే టెక్ కంపెనీని స్థాపించి విజయం సాధించారు. అతను దానిని గత సంవత్సరం అట్లాసియన్‌కు విక్రయించాడు. ఆ సేల్ ద్వారా వినయ్ కి 975 మిలియన్ డాలర్లు వచ్చాయి. అంటే దాదాపు రూ. 8 వేల కోట్లు. అతను అంత సంపాదించినప్పుడు అతని వయస్సు 35 సంవత్సరాల కంటే తక్కువ. అలాంటి వ్యక్తి కొత్త టెక్నాలజీ గురించి ఆలోచిస్తాడని లేదా తన కుటుంబంతో సరదాగా గడుపుతాడని మనం అనుకుంటాం. అయితే రెండు రోజుల క్రితం ఆయన చేసిన పోస్ట్ అందరినీ ఆశ్చర్యపరిచింది. ”నేను ధనవంతుడిని.. ఇప్పుడు ఏం చేయాలో తోచడం లేదు. నాకు కావాల్సిన ఆర్థిక స్వాతంత్ర్యం ఉన్నప్పటికీ నేను డైలమాలో ఉన్నాను. నేను జీవితం పట్ల అంత సానుకూలంగా లేను. నేను ఎవరి సానుభూతిని పొందేందుకు ఈ పోస్ట్‌ను పోస్ట్ చేయడం లేదు. ఈ సందేశం రాయడం వల్ల ప్రయోజనం ఏమిటో కూడా నాకు తెలియదు, ”అని తన బ్లాగ్‌లో రాశాడు.
గతేడాది కంపెనీని విక్రయించిన తర్వాత వినయ్ హిరేమత్ తన స్నేహితురాలితో కలిసి ప్రయాణం ప్రారంభించాడు. వారు అనేక ప్రాంతాలకు ప్రయాణించారు. అయితే అభద్రతాభావంతో ఆమెతో విడిపోయానని చెప్పాడు. “ఆమె ఈ పోస్ట్ చదువుతుంటే.. ఈ సందర్భంగా నేను క్షమాపణలు చెప్పాలనుకుంటున్నాను. మీరు కోరుకున్న విధంగా నేను ఉండలేకపోయాను. మీరు నాకు అందించిన అనుభవాలకు ధన్యవాదాలు” అని ఆయన వెల్లడించారు.
తన కంపెనీని కొన్న కంపెనీలో పనిచేసే అవకాశం వచ్చింది. అట్లాసియన్ 60 మిలియన్ డాలర్ల ప్యాకేజీని అందించింది. అయితే ఆ అవకాశాన్ని వినయ్ తిరస్కరించాడు. రోబోటిక్స్ కంపెనీని నెలకొల్పాలని తాను చేసిన ప్రయత్నం కూడా నిరాశనే మిగిల్చిందని అన్నారు. అలాగే ఎలోన్ మస్క్, వివేక్ రామస్వామి వంటి వారితో కలిసి పనిచేయాలని చేసిన ప్రయత్నాలు ముందుకు సాగలేదన్నారు. ప్రస్తుతం హవాయిలో ఫిజిక్స్ చదువుతున్నాడు. సంబంధిత అంశాలపై ఆయన దృష్టి సారిస్తున్నారు. అయితే ఆయన పోస్ట్ చర్చనీయాంశంగా మారింది.
