మరమ్మతులు, ప్రత్యామ్నాయ ఏర్పాట్లు

తాగునీటి వనరులు, బోర్లకు చిన్న మరమ్మతులు ఉంటే వెంటనే పూర్తి చేయాలని, రానున్న మూడు నెలల్లో సమస్యలు రాకుండా చూడాలని కలెక్టర్ సూచించారు. మల్లేపల్లిలో సంపు నిర్మాణం, ఇతర గ్రామాల్లో బోర్ల లీజుకు ప్రతిపాదనలు సిద్ధం చేయాలని ఆదేశించారు. గత వేసవిలో అధికారులు బాగా పనిచేసి తాగునీటి సమస్యను నివారించారని, ఈ ఏడాది కూడా అదే కృషి చేయాలని కోరారు. కొన్ని గ్రామాల్లో ఫ్లో వాల్వులు తొలగిస్తున్నట్లు ఫిర్యాదులు వస్తున్నాయని, దీనిపై ప్రజలకు అవగాహన కల్పించాలని, బలవంతంగా వాల్వులు తొలగిస్తే కఠిన చర్యలు తీసుకుంటామని హెచ్చరించారు.

ఇందిరమ్మ ఇళ్ళపై సమీక్ష

ఇందిరమ్మ ఇళ్ళ గ్రౌండింగ్‌పై సమీక్ష సందర్భంగా, సైట్ క్లియర్‌గా ఉన్న చోట వెంటనే ఫోటోలు తీసి పంపాలని, సాంకేతిక సమస్యలు ఉంటే తమ దృష్టికి తీసుకురావాలని కలెక్టర్ ఆదేశించారు. ఇళ్ళ పనులు ప్రారంభించే ముందు మార్కింగ్ చేసి, ఎమ్మెల్యేల ద్వారా ప్రారంభించాలని ఎంపీడీవోలను ఆదేశించారు.

అర్హులకు ప్రాధాన్యత

ఇందిరమ్మ ఇళ్లకు రాష్ట్ర ప్రభుత్వం అత్యంత ప్రాధాన్యత ఇస్తోందని, పూర్తిగా ఇల్లు లేనివారికి, గుడిసెల్లో నివసించేవారికి మొదటి ప్రాధాన్యత ఇస్తామని ఎమ్మెల్యే బాలునాయక్ తెలిపారు. జనవరి 26న మంజూరు చేసిన జాబితాలను మరోసారి పరిశీలించి అర్హులకు మాత్రమే ఇళ్ళు వచ్చేలా చూడాలని, అనర్హులు రాకుండా చూడాలని సూచించారు. మొదటి ప్రాధాన్యత తర్వాత దరఖాస్తు చేసుకున్నవారికి ఇళ్ళు ఇస్తామని, రానున్న నాలుగేళ్లలో ప్రతి పేదవాడికి ఇల్లు కట్టించి ఇస్తామని తెలిపారు. ఇందిరమ్మ ఇళ్ళ బాధ్యత పూర్తిగా ఎంపీడీవోలు, పంచాయతీ కార్యదర్శులదేనని స్పష్టం చేశారు.

భూసేకరణ, నష్టపరిహారం

భూసేకరణ సమీక్ష సందర్భంగా, నక్కలగండి తండాలో ఇల్లు కోల్పోయిన వారికి నష్టపరిహారం ఇవ్వలేదని, దీనిపై విచారణ జరిపి న్యాయం చేయాలని ఎమ్మెల్యే కోరారు. ఈ విషయంపై ప్రభుత్వ నిబంధనలను పరిశీలించి 10 రోజుల్లో చర్యలు తీసుకుంటామని కలెక్టర్ తెలిపారు. పెండ్లి పాకల ప్రాజెక్టు కింద ముంపు సందర్భంగా సర్వేలో నిర్మాణాల విలువను సరిగా చేయలేదని, న్యాయపరంగా పరిహారం అందేలా చూడాలని కోరారు. గుడి తండా, కారోబార్ తాండ తదితర గ్రామాల్లో భూసేకరణ సమస్యలను చర్చించారు.