అమరావతి: సంచలనం సృష్టిస్తున్న HMP వైరస్ (HMPV)పై ఆంధ్రప్రదేశ్ రాష్ట్ర ప్రభుత్వం  అప్రమత్తమైంది. HMPV వైరస్‌ సంసిద్ధతపై ముఖ్యమంత్రి చంద్రబాబు నాయుడు ఈరోజు  ఆరోగ్య శాఖ మంత్రి సత్యకుమార్‌ యాదవ్‌, ఆ శాఖ ఉన్నతాధికారులతో టెలికాన్ఫరెన్స్‌ నిర్వహించారు. HMPV  వైరస్‌పై ప్రభుత్వానికి సాంకేతిక సహాయం అందించేందుకు వెంటనే టాస్క్‌ఫోర్స్ లేదా నిపుణుల కమిటీని ఏర్పాటు చేయాలని చంద్రబాబు అధికారులకు ఆదేశాలు జారీ చేశారు. ఈ కమిటీలో మైక్రోబయాలజిస్టులు, పీడియాట్రిషియన్లు, శ్వాసకోశ వ్యాధుల నిపుణులు, ప్రివెంటివ్ మెడిసిన్ ప్రొఫెసర్లు ఉండాలని ముఖ్యమంత్రి సూచించారు.

అలాగే భవిష్యత్తులో తీసుకోవాల్సిన చర్యలపై ప్రభుత్వానికి సూచనలు ఇవ్వాలని కమిటీని చంద్రబాబు ఆదేశించారు. చైనాలో పుట్టిన హెచ్‌ఎంపీ వైరస్‌కు సంబంధించి కర్ణాటక, గుజరాత్ రాష్ట్రాల్లో కేసులు నమోదయ్యాయని వార్తలు ప్రచారం అవుతున్నాయి. వైరస్ వ్యాప్తి గురించి తెలుసుకున్న ముఖ్యమంత్రి చంద్రబాబు అప్రమత్తమయ్యారు. చిత్తూరు జిల్లా కుప్పంలో పర్యటిస్తున్న ముఖ్యమంత్రి వైద్యారోగ్య శాఖ మంత్రి సత్యకుమార్ యాదవ్, ఆ శాఖ ప్రత్యేక ప్రధాన కార్యదర్శి ఎంటీ కృష్ణబాబు, ఉన్నతాధికారులతో టెలికాన్ఫరెన్స్ నిర్వహించారు.

HMP వైరస్ – చంద్రబాబు ఏమన్నారు?

2001 నుంచి హెచ్‌ఎంపీ వైరస్‌ ఉందని, అయితే వ్యాప్తి తీవ్రత చాలా తక్కువగా ఉందని వైద్య నిపుణులు చెబుతున్నారు. ఈ వైరస్ గురించి ఆందోళన చెందాల్సిన అవసరం లేదని ఆయన ఏపీ ప్రజలకు భరోసా ఇచ్చారు. ఈ వైరస్ వల్ల తీవ్రమైన శ్వాసకోశ సమస్యలు రావని, రాష్ట్రంలో ఇప్పటి వరకు ఒక్క కేసు కూడా నమోదు కాలేదని ముఖ్యమంత్రి చెప్పారు. ప్రస్తుతం వైరస్ వ్యాప్తి చాలా తక్కువగా ఉన్నందున అప్రమత్తంగా ఉండాల్సిన అవసరం లేదన్నారు. హెచ్‌ఎంపీ వైరస్ సాధారణ సీజనల్ వ్యాధి అని, దీని ప్రభావం చాలా తక్కువగా ఉంటుందని సీఎం వెల్లడించారు.

వైరస్ నిర్ధారణ కోసం యూనిఫ్లెక్స్ కిట్లను వెంటనే కొనుగోలు చేయాలని అధికారులను ఆదేశించారు. వైరస్ వల్ల వచ్చే వ్యాధుల నిర్ధారణ కోసం రాష్ట్రంలో 10 వరకు ఐసీఎంఆర్ వైరాలజీ ల్యాబ్‌లు ఉన్నాయని ముఖ్యమంత్రి చంద్రబాబు వెల్లడించారు. వైరస్ నిర్ధారణ కోసం జర్మనీ నుండి 3,000 టెస్టింగ్ కిట్‌లను వెంటనే సేకరించాలని ఆయన ఆరోగ్య మంత్రిని ఆదేశించారు. రాష్ట్రంలో 4.5 లక్షల ఎన్-95 మాస్క్‌లు, 13.71 లక్షల ట్రిపుల్ లేయర్డ్ మాస్క్‌లు, 3.52 లక్షల పీపీఈ కిట్లు అందుబాటులో ఉన్నాయని అధికారులు తెలిపారు. వచ్చే మూడు నెలలకు సరిపడా శానిటైజర్లు కొనుగోలు చేయాలని సీఎం చంద్రబాబు అధికారులను ఆదేశించారు.