పాడుతా తీయగా అనే సంగీత రియాలిటీ షో ఎంతో మంది ప్రేక్షకుల మనసు గెలిచింది. ఎంతోమంది సంగీత ప్రియులు ఈ షో కోసం వేచి చూస్తూ టీవీలకు అతుక్కుపోతారు. ఈ షో ఎంతో కాలంగా ప్రసారం అవుతూ, గొప్ప గాత్రాలను ప్రేక్షకులకు పరిచయం చేసింది. ఎస్పీ బాలసుబ్రహ్మణ్యం గారు ఈ షోకి న్యాయనిర్ణేతగా ఉన్న సమయంలో మరింత ఆదరణ పొందింది. కానీ ఇప్పుడు ఈ షోపై తీవ్రమైన ఆరోపణలు బయటకొచ్చాయి.
ప్రవస్తి ఆరాధ్య సంచలన వ్యాఖ్యలు
పాడుతా తీయగా సిల్వర్ జూబ్లీ సిరీస్ లో పాల్గొన్న సింగర్ ప్రవస్తి ఆరాధ్య ఇటీవల ఓ వీడియో రిలీజ్ చేసి షాకింగ్ విషయాలను వెల్లడించింది. ఆమె మాట్లాడుతూ, ఈ షోలో ప్రస్తుతం ఉన్న జడ్జిలైన కీరవాణి, సునీత, చంద్రబోస్ తపనలేకుండా వేదిస్తున్నారని ఆరోపించింది. తనపై వివక్ష చూపారని, పనిగట్టుకుని తనను అవమానించారని ఆమె తెలిపింది. ఈ షోలో పాల్గొన్న తర్వాత మానసికంగా బాధ పడ్డానని, డిప్రెషన్ లోకి వెళ్లానని తెలిపింది.
సునీతకు తనపై పడదంటూ సంచలనం
ప్రవస్తి మాటల్లో, సింగర్ సునీత గారికి తాను ఎంత నచ్చకపోతే, తనను చూసినప్పుడల్లా ముఖం తిరగేస్తారని, కావాలనే తన పాటలపై నెగిటివ్ కామెంట్లు ఇస్తారని చెప్పింది. ఒకసారి సునీత మైక్ ఆపడం మర్చిపోయిన సమయంలో చేసిన వ్యాఖ్యలు తాను తన చెవిలో ఉన్న ఇయర్‌ఫోన్ల ద్వారా విన్నానని చెప్పింది. తన వాయిస్ లో బేస్ లేదని, అయితే మేనేజ్ చేయడానికి ప్రయత్నిస్తుందని ఆమె చెప్పిన మాటలు తన్ను కుదిపేశాయని పేర్కొంది.
ఎక్స్‌పోజింగ్ చేయమని కాస్ట్యూమ్ డిపార్ట్‌మెంట్ ఆదేశాలు?
ఈ షో ప్రొడక్షన్ టీమ్ పట్ల కూడా ప్రవస్తి తీవ్ర అసంతృప్తి వ్యక్తం చేసింది. వాళ్లు అమ్మాయిలకు సరైన డ్రెస్ ఇవ్వకుండా, ఎక్స్‌పోజింగ్ చేయమని చెప్పేవారని ఆరోపించింది. ఒక డిజైనర్ అయితే, “నీ బాడీకి ఇంకేమివ్వగలను?” అంటూ అసభ్యంగా మాట్లాడాడని, ఆ మాటలు విని తాను నొచ్చుకున్నానని చెప్పింది. ఇలాంటి పరిస్థితుల్లో తన ఆత్మవిశ్వాసం పూర్తిగా తుడిచిపెట్టుకుపోయిందని, బాలూ గారు ఉన్నప్పుడు ఇలాంటి పరిస్థితులు ఏవీ లేవని తేల్చిచెప్పింది.
ఎందుకు ఈతరహా పక్షపాతం?
ఒకసారి తనకు “అంతా రామమయం” అనే మేల్ వాయిస్ పాట ఇవ్వడం వల్ల తేడాగా పాడాల్సి వచ్చిందని, ఆ కారణంగా జడ్జీలు నెగిటివ్ కామెంట్స్ ఇచ్చారని పేర్కొంది. కానీ, అదే షోలో మరో అమ్మాయి లిరిక్స్ మర్చిపోయినా, ఆమెను ఎవరూ తప్పుపట్టలేదని తెలిపింది. తనపై మాత్రమే ఇంత అన్యాయం ఎందుకు జరుగుతోందో అర్థం కావడం లేదని వాపోయింది.
ప్రేక్షకుల్లో కలకలం.. షోపై ప్రశ్నలు
ప్రవస్తి చేసిన ఈ వ్యాఖ్యలు సోషల్ మీడియాలో వైరల్ అవుతున్నాయి. ఎంతోమంది ప్రేక్షకులు ఆమెకు మద్దతుగా నిలుస్తున్నారు. ఇక షో నిర్వహణ, న్యాయనిర్ణేతల తీరుపై ప్రశ్నలు తలెత్తుతున్నాయి. పాడుతా తీయగా వంటి పెద్ద బ్రాండ్ ఉన్న షోలో ఇలాంటి ఆరోపణలు రావడంతో ఇప్పుడది హాట్ టాపిక్ గా మారింది.
ఇక ప్రవస్తి ఇచ్చిన ఈ స్టేట్మెంట్‌పై అధికారిక స్పందన రావాల్సి ఉంది. కానీ ఆమె చెప్పిన విషయాలు చూసిన వారంతా షాక్ అవుతున్నారు. Padutha Teeyaga షో నిజంగా ఇలా మారిపోయిందా? అన్న ప్రశ్నలు ప్రేక్షకుల మనసుల్లో పుట్టిస్తున్నాయి.
