తన బౌలింగ్ కోటాలో మొదటి రెండు ఓవర్లలో చాలా పరుగులు ఇచ్చిన తర్వాత, పంజాబ్ కెప్టెన్ శ్రేయాస్ అయ్యర్ 19వ ఓవర్ వేయడానికి చాహల్‌ను తిరిగి దాడిలోకి తీసుకువచ్చాడు.

చాహల్ ఒక ఓవర్‌లో అద్భుతం చేశాడు. CSK కెప్టెన్ MS ధోనీ మొదటి బంతిని సిక్స్ కొట్టాడు.. తర్వాత రెండవ బంతికి పెద్ద షాట్ కొట్టడానికి ప్రయత్నించి అవుట్ అయ్యాడు. ఈ క్రమంలో క్రీజులోకి వచ్చిన హుడా మూడవ బంతికి రెండు పరుగులు చేశాడు.

చాహల్ మ్యాజిక్ ఇక్కడి నుంచే ప్రారంభమైంది. నాల్గవ బంతికి దీపక్ హుడా, ఐదవ బంతికి కాంబోజ్, ఆరో బంతికి నూర్ అహ్మద్ ఔటయ్యారు. దీనితో, చాహల్ ఖాతాలో రెండవ IPL హ్యాట్రిక్ చేరింది. మొత్తం మీద మూడు ఓవర్లు బౌలింగ్ చేసిన చాహల్ 32 పరుగులకు 4 వికెట్లు పడగొట్టాడు. ఈ క్రమంలో చాహల్ తన పేరు మీద ఎన్నో అరుదైన రికార్డులను లిఖించుకున్నాడు.

చాహల్ సాధించిన రికార్డులు ఇవే..

• ఐపీఎల్‌లో పంజాబ్ కింగ్స్ తరపున హ్యాట్రిక్ వికెట్లు తీసిన నాల్గవ బౌలర్ చాహల్. ఈ జాబితాలో దిగ్గజ ఆల్ రౌండర్లు యువరాజ్ సింగ్, అక్షర్ పటేల్, సామ్ కుర్రాన్ ఉన్నారు.
• ఐపీఎల్‌లో చెన్నై సూపర్ కింగ్స్‌పై హ్యాట్రిక్ వికెట్లు తీసిన తొలి బౌలర్‌గా చాహల్ చరిత్ర సృష్టించాడు. ఇప్పటివరకు ఏ బౌలర్ ఈ ఘనతను సాధించలేదు.
• ఐపీఎల్‌లో అత్యధిక హ్యాట్రిక్‌లుగా యువరాజ్ సింగ్ రికార్డును చాహల్ సమం చేశాడు. యువరాజ్, చాహల్ ఇద్దరూ రెండుసార్లు హ్యాట్రిక్‌లు సాధించారు. ఈ అరుదైన రికార్డు సాధించిన వారి జాబితాలో అమిత్ మిశ్రా (3) అగ్రస్థానంలో ఉన్నాడు.

అదేవిధంగా, ఐపీఎల్‌లో అత్యధికంగా 4 వికెట్లు తీసిన బౌలర్‌గా చాహల్ నిలిచాడు. ఇప్పటివరకు 9 సార్లు చాహల్ 4 వికెట్లు తీసుకున్నాడు. గతంలో ఈ రికార్డు సునీల్ నరైన్ (8) పేరిట ఉండేది. తాజా మ్యాచ్ తో నరైన్ రికార్డును చాహల్ బద్దలు కొట్టాడు.