తెలంగాణ ప్రభుత్వం పదవ తరగతి విద్యార్థులకు శుభవార్త అందించింది. ప్రభుత్వ పాఠశాలల్లో చదువుతున్న పదవ తరగతి విద్యార్థులకు సాయంత్రం వేళల్లో స్నాక్స్ అందించాలని ప్రభుత్వం నిర్ణయించింది.

ఈ మేరకు పాఠశాల విద్యా డైరెక్టర్ నరసింహ రెడ్డి జనవరి 29, 2025న అన్ని జిల్లాల డీఈఓలకు ఆదేశాలు జారీ చేశారు. ఫిబ్రవరి 1, 2025 నుండి మార్చి 20 వరకు మొత్తం 38 పని దినాలకు స్నాక్స్ అందించనున్నట్లు ఉత్తర్వుల్లో పేర్కొన్నారు. తెలంగాణలో పదవ తరగతి పరీక్షలు మార్చి 21, 2025 నుండి జరుగుతాయని తెలిసింది. పరీక్షలను దృష్టిలో ఉంచుకుని, ప్రభుత్వ పాఠశాలల్లో చదువుతున్న విద్యార్థులకు స్నాక్స్ అందించాలని ప్రభుత్వం నిర్ణయించింది. ప్రభుత్వ నిర్ణయంపై విద్యార్థుల తల్లిదండ్రులు సంతోషం వ్యక్తం చేస్తున్నారు.

ఇదిలా ఉండగా, మార్చి 21, 2025 నుండి ఏప్రిల్ 2 వరకు పదో తరగతి పరీక్షలు నిర్వహించాలని విద్యా శాఖ నిర్ణయించిన విషయం తెలిసిందే. పరీక్షలు ఉదయం 9.30 నుండి మధ్యాహ్నం 12.30 గంటల వరకు జరుగుతాయని చెబుతున్నారు. మార్చి 21న ఫస్ట్ లాంగ్వేజ్, మార్చి 22న సెకండ్ లాంగ్వేజ్, మార్చి 24న ఇంగ్లీష్, మార్చి 26న మ్యాథ్స్, మార్చి 28న ఫిజిక్స్, మార్చి 29న బయాలజీ, ఏప్రిల్ 2న సోషల్ స్టడీస్. పదో తరగతి పరీక్షా విధానంలో ప్రభుత్వం కీలక మార్పులు చేసిన విషయం తెలిసిందే. ఇంటర్నల్ మార్కుల విధానంతో పాటు గ్రేడింగ్ విధానాన్ని కూడా నిలిపివేసింది.

ఇక నుంచి 100 మార్కులకు పరీక్షలు నిర్వహించనున్నారు. ఈ మేరకు విద్యా శాఖ ప్రిన్సిపల్ సెక్రటరీ బుర్రా వెంకటేశం ఉత్తర్వులు జారీ చేశారు. ఈ మార్పులు 2024-25 విద్యా సంవత్సరం నుండి అమల్లోకి వస్తాయని ప్రకటించారు. రాష్ట్రంలో పదవ తరగతి సబ్జెక్టులు తెలుగు, హిందీ, ఇంగ్లీష్, మ్యాథ్స్, సైన్స్, సోషల్ స్టడీస్ ఉండగా, సైన్స్, ఫిజిక్స్‌లో మాత్రమే రెండు వేర్వేరు పరీక్షలు నిర్వహిస్తున్నారు. అయితే, ఇప్పటివరకు, ప్రతి సబ్జెక్టులో 100 మార్కులు ఉండేవి, వాటిలో 80 మార్కులు రాత పరీక్షలు, 20 మార్కులు ఇంటర్నల్ మార్కులు.

ప్రభుత్వం ఈ విధానాన్ని ఎత్తివేసింది. ఇక నుంచి 100 మార్కులకు రాత పరీక్ష నిర్వహిస్తామని ప్రకటించారు. 2014 నుంచి రాష్ట్రంలో సీసీఈ విధానం అమలులోకి వచ్చింది. దీంతో మూడు నెలలు, ఆరు నెలలు, వార్షిక పరీక్షా విధానాన్ని తొలగించి ఫార్మేటివ్ అసెస్‌మెంట్-ఎఫ్ఏ, సమ్మేటివ్ అసెస్‌మెంట్-ఎస్‌ఏ విధానాన్ని అమలు చేస్తున్నారు. దీని ప్రకారం 2015 నుంచి పదో తరగతి పరీక్షల్లో ఇంటర్నల్ మార్కుల విధానాన్ని అమలులోకి తెచ్చారు. దీని ప్రకారం ఏటా జరిగే నాలుగు ఎఫ్ఏలలో వచ్చిన మార్కుల ఆధారంగా ఉపాధ్యాయులు 20 ఇంటర్నల్ మార్కులను కేటాయించేవారు. రాత పరీక్ష ద్వారా 80 మార్కులు ఉండేవి. అయితే, ప్రభుత్వం తీసుకున్న నిర్ణయంతో ఇంటర్నల్ మార్కుల వ్యవస్థకు బ్రేక్ పడినట్లైంది.