తెలంగాణ రాష్ట్ర ప్రభుత్వం రేషన్ కార్డులలో కీలక మార్పులకు సిద్ధంగా ఉంది. బిపిఎల్ వర్గాలకు మూడు రంగుల కార్డులు, ఎపిఎల్ వర్గాలకు ఆకుపచ్చ రేషన్ కార్డులు జారీ చేయనున్నట్లు పౌర సరఫరాల మంత్రి ఉత్తమ్ కుమార్ రెడ్డి తెలిపారు. కొత్త కార్డుల ముద్రణ కోసం ఇప్పటికే టెండర్లు పిలిచామని, వాటిని త్వరలో అందజేస్తామని ఆయన అన్నారు.
తెలంగాణ జనాభాలో 84 శాతం మందికి సన్నబియ్యం అందుతోందని పేర్కొన్న ఉత్తమ్, ఇది దేశంలో కీలకమైన కార్యక్రమంగా మారిందని అన్నారు. కేంద్రం నెలకు ఒక్కొక్కరికి 5 కిలోల బియ్యాన్ని అందిస్తుండగా, రాష్ట్ర ప్రభుత్వం 6 కిలోల సన్నబియ్యాన్ని ఉచితంగా అందిస్తోందని స్పష్టం చేశారు.
దీని కోసం రూ. 13 వేల కోట్లు ఖర్చు చేస్తున్నారని ఆయన అన్నారు. ఇప్పటివరకు ఇచ్చిన బియ్యంలో 80-90 శాతం దారితప్పిందని, కానీ సరఫరా చేస్తున్న సన్నబియ్యం 100 శాతం వినియోగిస్తున్నామని మంత్రి అన్నారు. పేదలకు రూ. 40 విలువైన ఉచిత బియ్యాన్ని అందించడం ప్రభుత్వం సామాజిక బాధ్యతగా చూస్తుందని మంత్రి ఉత్తమ్ స్పష్టం చేశారు.
Related News
రాష్ట్రంలో ఇప్పటివరకు 2,573 వరి సేకరణ కేంద్రాలను ప్రారంభించామని, మొత్తం 8,209 కేంద్రాలను ఏర్పాటు చేయడమే లక్ష్యంగా పెట్టుకున్నామని మంత్రి ఉత్తమ్ కుమార్ రెడ్డి వెల్లడించారు. 17 కంటే ఎక్కువ తేమ ఉన్న ధాన్యాన్ని కొనుగోలు చేయబోమని ఆయన స్పష్టం చేశారు. సన్న బియ్యం పంపిణీ కోసం 30 లక్షల టన్నుల ధాన్యాన్ని సిద్ధంగా ఉంచినట్లు ఆయన తెలిపారు.
రేషన్ కార్డు కొత్త దరఖాస్తులను వేగవంతం చేయాలి
రాష్ట్రంలో ప్రస్తుతం 2.81 కోట్ల మందికి రేషన్ బియ్యం అందుతున్నాయని మంత్రి తెలిపారు. కొత్త దరఖాస్తుల వెరిఫికేషన్ పూర్తయితే ఈ సంఖ్య 3.10 కోట్లకు చేరుకునే అవకాశం ఉందని ఆయన వెల్లడించారు. ఎన్నికల కమిషన్ అనుమతి లేకపోవడంతో హైదరాబాద్‌లో తాత్కాలికంగా పంపిణీని నిలిపివేసినట్లు ఆయన తెలిపారు. ఎన్నికల తర్వాత దీనిని తిరిగి ప్రారంభిస్తామని ఆయన తెలిపారు.
