SLBC సొరంగం ప్రమాదం ఫిబ్రవరి 22న జరిగింది. దాదాపు 16 రోజుల తర్వాత సహాయక చర్యలో కొంత పురోగతి ఉంది. కేరళ నుండి వచ్చిన ప్రత్యేక కుక్కల సహాయంతో నిన్న మృతదేహాన్ని కనుగొన్న సిబ్బంది మృతదేహాన్ని తొలగించడానికి 12 గంటలు కష్టపడి పనిచేశారు. మృతుడిని TBM ఆపరేటర్ గురుప్రీత్ సింగ్‌గా అధికారులు గుర్తించారు. ఆయన చనిపోయి 16 రోజులు కావడంతో, మృతదేహం గుర్తుపట్టలేనంతగా మారిపోయింది. మృతదేహంపై ఉన్న బ్రాస్‌లెట్‌ను చూసి అధికారులు ఆయనను గురుప్రీత్ సింగ్‌గా గుర్తించారు. తరువాత, అక్కడ పోస్టుమార్టం నిర్వహించి మృతదేహాన్ని కుటుంబ సభ్యులకు అప్పగించారు. మృతుడు TBM ఆపరేటర్ గురుప్రీత్ సింగ్ మరణం పట్ల సీఎం రేవంత్, ఉత్తమ్ సంతాపం తెలిపారు. మృతుడి కుటుంబ సభ్యులకు సీఎం రేవంత్ రెడ్డి కూడా తన ప్రగాఢ సానుభూతిని తెలిపారు.
ప్రమాదంలో మరణించిన గురుప్రీత్ సింగ్ కుటుంబానికి తెలంగాణ ప్రభుత్వం రూ.25 లక్షల పరిహారం ప్రకటించింది. ఈ పరిహారం కోసం చెక్కును అధికారులు గురుప్రీత్ కుటుంబానికి అందజేయనున్నారు. గురుప్రీత్ మృతదేహాన్ని పంజాబ్‌లోని ఆయన స్వస్థలానికి తరలించారు. ఇదిలా ఉండగా మిగిలిన ఏడుగురి కోసం అన్వేషణ 17వ రోజు కూడా కొనసాగుతోంది. ఈ ప్రమాదంలో సొరంగంలో చిక్కుకున్న వారిని వెతకడానికి వివిధ యంత్రాలు, నిపుణులను రప్పించారు. కానీ, వారిని కనుగొనడానికి చేసిన ప్రయత్నాలు ఆశించిన ఫలితాలను ఇవ్వలేదు. కానీ కేరళ నుండి తీసుకువచ్చిన మాయ, మర్ఫీ అనే రెండు బెల్జియన్ నియాపోలిటన్ కుక్కలు మృతదేహాలు దొరికిన అనేక ప్రదేశాలను కనుగొన్నాయి. ఒక చోట మట్టిని తొలగించినప్పుడు రెస్క్యూ బృందం ఒక మృతదేహాన్ని కనుగొంది. రెస్క్యూ బృందం నేడు మరో రెండు ప్రదేశాలలో తవ్వకాలు చేపట్టనుంది. అయితే, భారీ బోరింగ్ యంత్ర భాగాలకు ఆటంకం ఏర్పడటం వల్ల రక్షణ కష్టంగా మారుతోందని తెలుస్తోంది.
