ఇప్పటి తరం జీవనశైలి బాగా మారిపోయింది. పెళ్లిళ్లు, అనారోగ్య పరిస్థితులు, పిల్లల ఉన్నత చదువులు, ఇంటి రిపేర్లు, ఇతర అత్యవసర అవసరాలకు ఒక్కసారిగా పెద్ద మొత్తంలో డబ్బు అవసరమవుతుంది. అప్పుడు చాలామంది నేరుగా బ్యాంకులు లేదా ఫైనాన్స్ కంపెనీల వద్దకు వెళ్లి పర్సనల్ లోన్ తీసుకుంటున్నారు. ఎందుకంటే ఇది నాన్-కాలటరల్ లోన్. అంటే మన నుంచి ఎటువంటి ఆస్తి గానీ, భూమి గానీ, డాక్యుమెంట్లు గానీ తీసుకోకుండా మన ఆధార్, పాన్, సాలరీ స్లిప్ లతోనే డబ్బు ఇస్తారు.
పర్సనల్ లోన్ తీసుకున్న తర్వాత ప్రతి నెలా ఓ ఫిక్స్‌డ్ మొత్తం ఈఎంఐగా బ్యాంకుకి తిరిగి చెల్లించాల్సి ఉంటుంది. మొదట్లో చాలామంది సరిగా చెల్లిస్తారు. కానీ కొన్ని నెలలు అయ్యాక డబ్బు లేకపోవడం, ఉద్యోగం పోవడం, ఆసుపత్రి ఖర్చులు ఇలా అనేక కారణాల వల్ల ఈఎంఐలు మిస్ అవుతారు. ఒక నెల రెండు నెలలు మిస్ అవుతారు. మొదట్లో ఇది పెద్ద సమస్యగా అనిపించదు. కానీ ఇలాంటివే చివరికి జైలు దాకా తీసుకెళ్లే ప్రమాదం ఉందని చాలా మందికి తెలియదు.
పర్సనల్ లోన్ తీసుకున్న తర్వాత ఒక నెల చెల్లించకపోయినా, బ్యాంకు అధికారుల నుంచి వెంటనే ఫోన్ కాల్స్ వస్తుంటాయి. మిమ్మల్ని మెసేజ్ లతో, ఇమెయిల్ లతో గుర్తు చేస్తారు. కొన్ని సందర్భాల్లో గుణంగా మాట్లాడి సహాయం చేయడానికి కూడా సిద్ధంగా ఉంటారు. ఎందుకంటే బ్యాంక్ కి అసలు ఉద్దేశ్యం డబ్బు వసూలు కావడం మాత్రమే. కానీ మీరు అలా పదే పదే కాల్స్ వచ్చినా స్పందించకుండా ఉంటే పరిస్థితి పూర్తిగా మారిపోతుంది.
Related News
మూడు నెలలు వరుసగా ఈఎంఐ చెల్లించకపోతే బ్యాంక్ ఇక రికవరీ ఏజెంట్లను రంగంలోకి దింపుతుంది. వారు మొదట ఫోన్ చేస్తారు. మిమ్మల్ని కాల్ చేసి మీ పరిస్థితి అడుగుతారు. అప్పటికీ మీరు స్పందించకపోతే ఏజెంట్లు నేరుగా ఇంటికి రావచ్చు. అక్కడే మీతో మాట్లాడే అవకాశం ఉంటుంది. అయితే రిజర్వ్ బ్యాంక్ ఆఫ్ ఇండియా ఇచ్చిన గైడ్‌లైన్స్ ప్రకారం ఈ రికవరీ ఏజెంట్లు ఎట్టి పరిస్థితుల్లోనూ బెదిరింపులకు పాల్పడకూడదు. కానీ కొన్ని సందర్భాల్లో వాళ్లు మానసిక ఒత్తిడికి గురిచేస్తూ ప్రెషర్ పెడతారు. మీరు మానవీయంగా స్పందిస్తే వాళ్లు కూడా చక్కగా వ్యవహరించేవాళ్లు.
ఇంకా మీరు స్పందించకపోతే ఆరు నెలలు వరుసగా ఈఎంఐ చెల్లించని కస్టమర్లపై బ్యాంకులు చట్టపరమైన చర్యలు తీసుకోవడం ప్రారంభిస్తాయి. మొదటగా మీకు లీగల్ నోటీసు పంపిస్తారు. దీనిలో మీరు ఎంత డబ్బు బాకీ ఉన్నారో, ఎన్ని నెలలుగా చెల్లించలేదో, ఇప్పుడు ఎంత మొత్తాన్ని ఎప్పుడు చెల్లించాలో పూర్తి వివరాలు ఉంటాయి. చాలామందికి ఈ నోటీసు వచ్చిందంటే భయమేస్తుంది. కానీ ఇది క్రిమినల్ కేసు కింద రాదు. ఇది సివిల్ నోటీసు మాత్రమే.
ఈ నోటీసు వచ్చిన తర్వాత మీరు బ్యాంక్ తో మాట్లాడి సెటిల్మెంట్ చేసుకునే అవకాశం ఉంది. అంటే మీరు చెల్లించగలిగే మొత్తం ఎంతైనా చర్చించి ఓ నిర్ణయానికి రావచ్చు. కానీ మీరు అక్కడ కూడా సహకరించకపోతే బ్యాంక్ కోర్టులో కేసు వేస్తుంది. కోర్టు మీ ఆదాయం, మీరు చేసే పని, ఇతర ఆస్తులు అన్నీ పరిశీలించి, మీరు ఎంత మొత్తం చెల్లించాలో నిర్ణయిస్తుంది. కొన్ని సందర్భాల్లో కోర్టు మీ జీతంలో నుండి డైరెక్ట్ డిడక్షన్ ఆర్డర్ ఇవ్వొచ్చు. ఇంకొన్ని సందర్భాల్లో మీ వాహనం లేదా ఇతర ఆస్తులు సీజ్ చేసే అవకాశం కూడా ఉంటుంది.
ఇక అత్యంత తీవ్రమైన విషయమేమిటంటే – మీరు ఉద్దేశపూర్వకంగా లోన్ తీసుకుని చెల్లించకపోతే, ఆ చర్య క్రిమినల్ మైన్డ్ తో చేశారని కోర్టు నిర్ధారించుకుంటే, అది మోసపూరిత చర్యగా పరిగణించవచ్చు. అప్పుడు మీ మీద కఠిన చర్యలు తీసుకోవచ్చు. కొన్ని కేసుల్లో జైలు శిక్ష కూడా పడే ప్రమాదం ఉంది. ముఖ్యంగా డాక్యుమెంట్లు ఫేక్ గా చూపించి లోన్ తీసుకుని పరారైన వారి మీద బ్యాంకులు పోలీసులకు ఫిర్యాదు చేస్తాయి. అలాంటి వాళ్లు కఠినంగా శిక్షింపబడతారు.
ఈ పరిస్థితులన్నీ చూస్తే మనకు స్పష్టంగా అర్థమయ్యే విషయం ఒక్కటే. పర్సనల్ లోన్ తీసుకోవడం తేలికే అయినా, దాన్ని టైమ్ కి తిరిగి చెల్లించడం చాలా కీలకం. అప్పు తీసుకుంటే ఓ బాధ్యతగా తీసుకోవాలి. డబ్బు అవసరం ఉండొచ్చు కానీ చెల్లించలేనంత లోన్ తీసుకోవద్దు. బడ్జెట్ లో ప్లాన్ చేసుకుని, అవసరాన్ని బట్టి మాత్రమే లోన్ తీసుకోవాలి. ముఖ్యంగా ఎక్కువ ఈఎంఐలు ఉండే లోన్ తీసుకోవడం ముందు రెండు సార్లు ఆలోచించాలి.
ఒక్కసారి ఈఎంఐ మిస్ అయితే మన క్రెడిట్ స్కోర్ కూడా పడిపోతుంది. ఇది భవిష్యత్తులో మనం మరో లోన్ తీసుకోవాలంటే పెద్ద సమస్య అవుతుంది. బ్యాంకులు మళ్లీ మన మీద నమ్మకం చూపవు. అంతేకాదు కొన్ని కంపెనీలు ఉద్యోగాల కోసం వెరిఫికేషన్ చేసేప్పుడు కూడా మన క్రెడిట్ హిస్టరీను చెక్ చేస్తాయి. అలా మన కెరీర్ మీద కూడా ప్రభావం పడే అవకాశం ఉంది.
కాబట్టి డబ్బు అవసరమైతే తప్పకుండా లోన్ తీసుకోవచ్చు. కానీ దానిని సమయానికి చెల్లించేందుకు ముందుగానే ప్లాన్ చేయాలి. వాయిదాలు మిస్ కాకుండా చూసుకోవాలి. అప్పు తీసుకోవడం కన్నా అప్పు తిరిగి ఇవ్వడంలోనే మన నిజమైన సామర్థ్యం కనిపిస్తుంది.
ఇక నిబంధనలు కఠినంగా మారుతున్న ఈ రోజుల్లో లోన్ తీసుకుని నిర్లక్ష్యంగా వ్యవహరించకండి. లేదంటే పెద్ద శిక్షలే ఎదురవుతాయి. జాగ్రత్తగా ఉండండి. తప్పు చేయకండి. లోన్ తీసుకునే ముందు ఆలోచించండి. తీసుకున్నాక సమయానికి చెల్లించండి. లేదంటే ఒక చిన్న పొరపాటు… నేరుగా జైలుకే తీసుకెళ్లే ప్రమాదం ఉంది!
