ఆంధ్రప్రదేశ్ ప్రభుత్వం రాష్ట్రవ్యాప్తంగా పాఠశాలల వేళల్లో మార్పులు చేసింది. అకడమిక్ క్యాలెండర్‌లో సాయంత్రం 4 నుంచి 5 గంటల వరకు ఐచ్ఛికాన్ని తప్పనిసరి చేస్తూ ఏపీ పాఠశాల విద్యాశాఖ ఉత్తర్వులు జారీ చేసింది.

ఏపీలోని ఉన్నత పాఠశాలల పనివేళలు ప్రస్తుతం ఉదయం 9 నుంచి సాయంత్రం 4 గంటల వరకు ఉన్నాయి. దీన్ని 5 గంటలకు పెంచారు. రాష్ట్రవ్యాప్తంగా ప్రయోగాత్మకంగా ఒక్కో మండలంలో రెండు పాఠశాలల్లో ఈ విధానాన్ని అమలు చేయాలని ఆదేశించారు. పాఠశాలల్లో ఉదయం, మధ్యాహ్నం విరామ సమయాన్ని 5 నిమిషాల చొప్పున పెంచారు. భోజన విరామాన్ని 15 నిమిషాలు పెంచారు. ఉదయం మొదటి పీరియడ్‌ను 5 నిమిషాల నుంచి 50 నిమిషాలకు పెంచారు. అంతేకాదు, ప్రస్తుతం 40 నిమిషాల చొప్పున ఉన్న తదుపరి 3 పీరియడ్‌లను 45 నిమిషాలకు పెంచారు. పైగా, మధ్యాహ్నం మొదటి పీరియడ్ మార్చలేదు. తదుపరి 3 పీరియడ్‌లు 45 నిమిషాలకు పెంచబడ్డాయి. ఈ మార్పులతో, రోజులో పాఠశాల సమయం ఒక గంట పెరుగుతుంది.

మొదట పైలట్‌గా అమలు 

ఎంపిక చేసిన పాఠశాలల్లో నవంబర్ 25 నుంచి 30 వరకు ఈ విధానంలో పాఠశాలలు నడపనుండగా.. సబ్జెక్టుల బోధనకు మాత్రమే గంటను పొడిగించినట్లు అధికారులు తెలిపారు. మిగిలిన వెయిటేజీలో ఎలాంటి మార్పు ఉండదు. ఈ విధానం తర్వాత ఈ నెల 30వ తేదీన డెరైక్టరేట్ ఆఫ్ స్కూల్ ఎడ్యుకేషన్‌కు అభిప్రాయాలను తెలియజేయాలి. ఇక్కడి ఫలితాలను బట్టి రాష్ట్రవ్యాప్తంగా అన్ని పాఠశాలల్లో అమలు చేయనున్నారు.

ఉపాధ్యాయ సంఘాల అభ్యంతరాలు

పాఠశాలల కొత్త పనివేళలపై ఉపాధ్యాయ సంఘాలు అభ్యంతరాలు వ్యక్తం చేస్తున్నాయి. ప్రస్తుత పని వేళలను కొనసాగించాలని డిమాండ్ చేస్తున్నారు. ప్రభుత్వ ఉన్నత పాఠశాలల పని వేళల మార్పు నిర్ణయంపై పునరాలోచించాలని  నాయకులు కోరారు. విద్యార్థులు 5కిలోమీటర్ల పరిధి నుంచి వస్తున్నందున సాయంత్రం 5 గంటల వరకు పాఠశాలలో ఉంటే ఇంటికి వెళ్లేందుకు ఇబ్బందులు పడాల్సి వస్తోందని వాపోతున్నారు. వాతావరణం, ఇంటి సమస్యల దృష్ట్యా పొడిగింపు నిర్ణయాన్ని ఉపసంహరించుకోవాలని కోరారు.