తెలంగాణలో పదేళ్ల నిరీక్షణకు తెరదించుతూ నేడు కొత్త రేషన్ కార్డుల పంపిణీ ప్రారంభం కానుంది. సూర్యాపేట జిల్లా తిరుమలగిరిలో సీఎం రేవంత్ రెడ్డి ఈ కార్యక్రమాన్ని లాంఛనంగా ప్రారంభించనున్నారు. రాష్ట్రవ్యాప్తంగా 3.58 లక్షల కొత్త కార్డులతో పాటు, పాత కార్డులకు కొత్తగా జోడించిన 4.41 లక్షల మందితో కలిపి మొత్తం 15.53 లక్షల మంది ప్రయోజనం పొందనున్నారు. దీనితో మొత్తం రేషన్ కార్డుల సంఖ్య 95.56 లక్షలకు చేరుకోగా, లబ్ధిదారులు 3 కోట్లకు చేరుకుంటారు.
తెలంగాణ పేదలకు తీపి వార్త. దాదాపు పదేళ్ల తర్వాత నేడు రాష్ట్రంలోని పేదలకు కొత్త రేషన్ కార్డులు పంపిణీ చేయనున్నారు. సూర్యాపేట జిల్లా తుంగతుర్తి నియోజకవర్గం పరిధిలోని తిరుమలగిరిలో ముఖ్యమంత్రి రేవంత్ రెడ్డి కొత్త రేషన్ కార్డుల పంపిణీని ప్రారంభించనున్నారు. తిరుమలగిరి తహశీల్దార్ కార్యాలయం సమీపంలో ఏర్పాటు చేసిన వేదిక నుంచి 11 మంది లబ్ధిదారులకు సీఎం కార్డులను పంపిణీ చేసి, అనంతరం బహిరంగ సభలో ప్రసంగిస్తారు. సీఎం కార్డులు పంపిణీ చేసిన వెంటనే, రాష్ట్రవ్యాప్తంగా 3.58 లక్షల కార్డులు లబ్ధిదారులకు పంపిణీ చేయబడతాయి.
కొత్తగా జారీ చేయబడిన 3,58,187 రేషన్ కార్డుల ద్వారా 11,11,223 మంది ప్రయోజనం పొందనున్నారు. అంతేకాకుండా, పాత రేషన్ కార్డులకు 4,41,851 మంది కొత్త సభ్యులను జోడించడం ద్వారా, మొత్తం 15,53,074 మందికి ఆహార భద్రత కింద రేషన్ ప్రయోజనాలు లభిస్తాయని పౌర సరఫరాల మంత్రి ఉత్తమ్ కుమార్ రెడ్డి తెలిపారు. కొత్త రేషన్ కార్డుల జారీ మరియు పాత కార్డులకు కొత్త వ్యక్తులను జోడించడం వల్ల తెలంగాణ ప్రభుత్వానికి ఏటా రూ. 1150.68 కోట్లు అదనంగా ఖర్చవుతుందని మంత్రి వివరించారు. ఈ కొత్త కార్డులతో, తెలంగాణలో మొత్తం రేషన్ కార్డుల సంఖ్య 95,56,625 కు చేరుకుంటుందని, లబ్ధిదారులు 3 కోట్లు దాటుతారని మంత్రి వివరించారు.
[news_related_post]తెలంగాణ ప్రజలు గత కొన్ని సంవత్సరాలుగా కొత్త రేషన్ కార్డుల కోసం ఎదురు చూస్తున్నారు. ప్రభుత్వం అనేక రౌండ్ల దరఖాస్తులను స్వీకరిస్తోంది. ఈ సంవత్సరం జనవరి 26న నాలుగు పథకాలు ప్రారంభించిన సమయంలోనే గ్రామసభలు మరియు మీ సేవా కేంద్రాలలో దరఖాస్తులు తీసుకున్నారు. మొదట ఏప్రిల్‌లో ఇస్తామని చెప్పినా, చాలాసార్లు వాయిదా పడింది. చివరకు జూలై 14న కొత్త కార్డులు జారీ చేయడంతో లక్షలాది కుటుంబాల సమస్య పరిష్కారం అవుతుంది. అయితే, రెండు రకాల కార్డులు జారీ చేస్తారా? లేక ఒకే రకమైన కార్డు జారీ చేస్తారా? దీనిపై ఇంకా స్పష్టత రాలేదు.
రేషన్ కార్డు లబ్ధిదారులకు ప్రభుత్వం సన్నబియ్యం బియ్యం పంపిణీ చేస్తున్నట్లు తెలిసింది. ప్రతి కుటుంబ సభ్యునికి 6 కిలోల సన్నబియ్యం పంపిణీ చేస్తున్నారు. జూన్, జూలై, ఆగస్టు కోటాకు సంబంధించిన బియ్యం ఇప్పటికే పంపిణీ చేయబడ్డాయి. సెప్టెంబర్ నుండి కొత్తగా కార్డులు మంజూరు చేసిన వారికి రేషన్ ఇవ్వబడుతుంది.
